Günel Babayeva Bakı şəhərində doğulub və orada böyüyüb-başa çatmışdır. 176 saylı orta məktəbi bitirmişdir. 1999-cu ildə məktəblilər arasında alman dili biliklərinə görə Almaniyanın PAD təşkiıatının Almaniyada 4 həftəlik təqaüdünü qazanmışdır.

Bakalavr təhsilini 2003-cü ildə Azərbaycan Dillər Universitetinin tərcüməçi (alman-azərbaycan, azərbaycan-alman) ixtisası üzrə bitirdikdən sonra Azərbaycanda tərcüməçi olaraq özəl sektorda çalışmışdır. 2011-2013-cü illərdə maqistratura təhsilini Almaniyanın Potsdam Universitetində “Xarici Dil Linqvistikası” (Alman və rus dilləri) ixtisası üzrə almışdır. 2021-ci ilin əvvəlində Berlin Texniki Universitetində “Azərbaycanda alman dilinin hazırki vəziyyəti” mövzusunda doktorluq dissertasiyasını uğurla müdafiə etmişdir.

“Deutsch als Fremdsprache in Aserbaidschan” adlı monoqrafiyası Peter Lang beynəlxalq nəşriyyatı tərəfindən New York, Vyana, Berlin, Oksford, Varşava, Bern və digər şəhərlərdə işıq üzü görmüşdür. Almaniyanın Katolik Akademik Gənclər Birliyinin 60 illik fəaliyyəti tarixində Azərbaycandan olan ilk və yeganə təqaüdçü olmuşdur. KAAD təşkilatı Babayevanın AFR-də 3 illik doktorantura təhsilimi maliyyələşdirmişdir.
2020-2024-cü illər ərzində Berlində Euroschule, GIZ kimi özəl təhsil müəssisələrində, eyni zamanda dövlət müəssisələrində Berlinin təhsil və gənclik senatının işçisi olaraq alman dili müəllimi kimi fəaliyyət göstərmişdir. G. Babayeva kontrastiv linqvistika sahəsində elmi-məqalələrin müəllifidir.